بلوكاوت
بزاف ناس ما يعرفوش بلي كنتاكي هي نفسها KFC. وهاذي العلامة دخلت للجزائر في الوقت اللي كانت فيه غزة تتقصّف، وراهي تتوسّع كل عام.
أول فرع كان مبرمج يفتح في أكتوبر 2023، نفس الشهر اللي بدات فيه الإبادة والعالم كامل بدا يقاطع. تأجّل الافتتاح، وفي 14 أفريل 2024 فتحت KFC أول فرع في دالي إبراهيم بالعاصمة، والإبادة في شهرها السابع. صاحب الامتياز في الجزائر هو مجموعة Azadea.
من أول يوم دارو وقفات قدّام الفرع، وفي يومين نحّاو اللوغو من الواجهة وعاودو فتحو بلا شعار.
عندها خمسة فروع في العاصمة: دالي إبراهيم، Garden City، City Center، سيدي يحيى وبن عكنون اللي فتح في جوان 2026، وراهي تحضّر باش تفتح في وهران. ومؤخرا مؤثرين بزاف راهم يديرو معاها تعاونات، وكل ريلز يجيب زبائن جدد.
KFC اللي هنا هي نفسها اللي عندها فروع خدّامة في الكيان المحتل، والجوج تابعين لنفس الشركة الأم Yum! Brands. وكل وجبة تشريها، جزء من حقها يروح لهاذي الشركة كحقوق امتياز.
في ماليزيا، KFC غلقت مؤقتا أكثر من 100 فرع بعد حملات المقاطعة. وحنا عندنا، الفروع راهي غير تتزايد، فخصنا نوقفوها قبل ما تكبر.
كاين واحد من صحابك مازال ياكل عندهم؟ ابعثلو هاذ المقال.
المصادر: Observ'Algérie، Arab News، Azadea، KFC في الكيان، Food Business MEA.
لا توجد تعليقات بعد. كن أول من يعلّق!