بلوكاوت في كل حي: اطبع، علّق، ووزّع

بلوكاوت يعاونك تتأكّد قبل ما تشري: يقولك إذا كان المنتج يدعم الاحتلال، ويوريلك البديل المحلي. بصّح بزّاف ناس مازال ما سمعوش بيه. على هاذي وجّدنا فلاير بلوكاوت، ونطلقو اليوم حملة بلوكاوت في كل حي باش يوصل لكل حومة.

واش كاين في الفلاير؟

سؤال بسيط: دراهمك وين يروحو؟ ومن تحتو شرح قصير على الموقع، ورمز QR يدّي ديركت لـ blockoutalgeria.org. لي يصوّرو بكاميرا التيليفون يدخل للموقع في ثانية.

كيفاش تشارك؟

1. حمّل الفلاير من صفحة المطبوعات. كاين A4 للتعليق، وA5 فيها جوج فلايرات في ورقة وحدة للتوزيع. وكل وحدة عندها نسخة ملوّنة للمطبعة، ونسخة بيضاء توفّر الحبر وتخرج مليح بالأبيض والأسود.
2. علّقو ولا وزّعو فلوحات الإعلانات في الجامعة والإقامة، المحلات بإذن صاحبها (والمحلات المقاطِعة أولى)، ومدخل العمارة. وما تعلّقوش على المباني الحكومية ولا على ملك الناس بلا إذن.
3. انضم للحملة بصورة وحدة: فلاير معلّق، ولا الفلايرات في يدك. وتجنّب تبان وجوه الناس.
4. من بعد، كل فلاير علّقتو ولا عطيتو تسجّلو بزر (+1)، بلا ما تصوّر من جديد.

الهدف

كل مشارك 10 فلايرات، والحملة كاملة 500 فلاير. وكي توصل لهدفك تقدر تكمّل: كل فلاير زايد يتحسب في هدف الحملة.

معرض الحملة

إذا وافقت على نشر صورتك، تظهر في معرض الحملة باسمك وولايتك بعد ما يراجعها الفريق. وإذا ما وافقتش تبقى خاصة. وفي صفحة الحملة تشوفو شحال من واحد دخل للموقع من الفلاير، وفي شحال من ولاية وصلت الحملة.

ابدا اليوم من صفحة الحملة، واطبع أول فلاير.