بلوكاوت
98 مليون تعليق… على 3 طوموبيلات. مسابقة انتشرت في إنستغرام هاذ الأيام، وبزاف ناس دخلو فيها. بصّح قبل ما تكتب تعليق آخر، أرواح نحسبوها مع بعضانا.
الريل تاع المسابقة وصل لـ98 مليون تعليق، وأزيد من 25 مليون مشاهدة (الأرقام كما ظهرت يوم 18 أكتوبر).
حساب بسيط: طوموبيل وحدة على كل 33 مليون تعليق تقريبا.
باش تشارك، لازم تبارطاجي الريل في الستوري، وتطاغي 5 من صحابك، وتبّع حساب المسابقة ومعاه 109 حساب تجاري.
يعني راك تديرلهم الإشهار باطل، وتجيب صحابك يديرو كيفك.
حساب المسابقة فيه منشور واحد برك، وعندو 620 ألف متابع. وكل واحد تبّعو مطلوب منو يتبّع معاه 109 حساب تجاري.
في هاذ النوع من المسابقات، الحسابات اللي في القائمة عادة تخلّص باش تدخل… وانت تخلّص بوقتك.
افهمها مليح: انت ماشي مشارك، انت هو السلعة.
كاينة وحدة قالت فالتعليقات: قعدت سمانة كاملة نكومونتي، كي نرجع من الخدمة عيانة… وكي خسرت، بكيت حتى رقدت.
هاذا ماشي حظ ناقص، هاذا استحمار واستغباء. تضيّع وقتك وأعصابك، على طوموبيل عمرها ما كانت ليك.
في القائمة اللي لازم تبّعها، كاين Skechers وSunsilk. الزوج «مقاطعة» في بلوكاوت وداعمين للكيان:
يعني بمشاركتك، راك تعطي متابعتك لعلامات تخدم مع الكيان، وتكبّرها بيدك.
ديزابوني من الحسابات اللي تبّعتهم غير على جال المسابقة. وقبل ما تعطي متابعتك لأي علامة، تأكّد منها في بلوكاوت.
تعرف واحد يشارك في هاذ المسابقات؟ ابعثلو هاذ المقال.
بارك الله فيكم
وفيك بارك الله ✨
💯 صح لي قلتوه هذا استحمار لينا ليق نعسوا لشايروجو في هاذ المسابقات خاصة الضخمة هدفهم الدنيا ومافيها وهدفنا الجهاد في سبيل الله ولو بأبسط شيء مشكورين على هذا المقال التوعوي 🔥✨